Минск қаласында Беларусь Республикасы Президенті жанындағы Басқару академиясы Астана хабы және Еуропа Кеңесімен бірлесіп ұйымдастырған «Мемлекеттік қызмет: қазіргі жағдайы және даму келешегі» халықаралық конференциясы өтті.
Жиырма елден келген қатысушылар Хабтың панельдік сессиясында Еуропа мен Азиядағы үкіметтердің цифрлық трансформациясы және мемлекеттік қызметшілерді ынталандыру, сондай-ақ мемлекеттік қызмет институттары дамуы туралы пікір бөлісіп, тәжірибе алмасты.
Конференцияның ашылуында Беларусь Басқару академиясының ректоры Геннадий Палчик құттықтау сөз сөйлеп, аймақтағы мемлекеттік қызметті дамыту үшін осындай платформаның маңыздылығын атап өтті.
Астана хабының басқарушы комитет төрағасы Алихан Байменов үкіметтер тиімділігінің шешуші факторы – мемлекеттік қызмет көрсету сапасы, сондықтан оны жетілдіру барлық елдер үкіметтерінің күн тәртібінде тұрғанын атап өтті. Байменов мемлекеттердің даму ерекшеліктерін ескермей, қолданатын әмбебап модельдің жоқ екенін айтты. Дегенмен, үкіметтер шешім қабылдауда жаһандық үдерістер мен мемлекеттер, соның ішінде Астана хабына қатысушы елдер тәжірибесін ескеретінін жеткізді.
Хаб сессиясы барысында әр елден келген қатысушылар тәжірибе алмасуға, аймақтағы мемлекеттік қызметті дамыту перспективаларын талқылауға және озық тәжірибелермен танысуға мүмкіндік алды.
Польша мемлекеттік қызметі жетекшісі Доброслав Довят-Урбанский мемлекеттік басқару жүйесіндегі заңнамалық процесті ұйымдастыру жайын баяндап, ашық консультация жүргізетін, сондай-ақ сарапшылар пікірін айқындаумен айналысатын қызметтер ерекше орын алатындығын атап өтті.
Украинаның мемлекеттік қызмет жөніндегі Ұлттық агенттігі басшысының орынбасары Андрей Заболотный өз елін мысалға келтіре отырып, мемлекеттік қызмет жүйесіндегі үкіметтің табысты бастамаларына тоқталып, жаңа заманауи сынақтар жайында сөз қозғады. Еңбекақы жүйесі туралы Беларусь Еңбек және Әлеуметтік қорғау бірінші вице-министрі Андрей Лобович өз ойын ортаға салса, Хабтың Консультативтік Кеңес мүшесі Панос Ливеракос осы бағытта аймақ мемлекеттері бойынша салыстырмалы шолу жасады.
Бельгияның мемлекеттік қызметшілерді олардың біліктілігі мен бағалау негізінде іріктеу тәжірибесімен Бельгия Корольдігінің Федералды мемлекеттік қызметінің (BOSA) қоғаммен байланыс жөніндегі менеджері Кетлин Вермейра таныстырды. Электрондық үкімет және электрондық қоғам тақырыбы Эстонияның электрондық үкімет саласындағы жетекші сарапшысы Вирго Риасаппидің баяндамасында қозғалды.
Әзірбайжан, Беларусь, Грузия, Қазақстан және Қырғызстан өкілетті мемлекеттік органдар өкілдері мен сарапшылары мемлекеттік қызмет саласын дамыту туралы өз тәжірибелерімен бөлісті.
Конференция аясында Алихан Байменов Польша мемлекеттік қызметінің жетекшісі Довят-Урбанскиймен, Украинаның мемлекеттік қызмет жөніндегі ұлттық агенттігі басшысының орынбасары Заболотныймен, сондай-ақ Тиранадағы (Албания) Еуропа Кеңесі бюросының жоба менеджері Кескумен және Федералды мемлекеттік қызметтің (BOSA) жетекші қоғаммен байланыс жөніндегі менеджерлерімен Вермейра және Сантос де Оливейрамен екіжақты кездесулер өткізді. Кездесулер барысында тараптар бірлескен іс-шаралар арқылы ынтымақтастықты тереңдету мүмкіндігін талқылады.
Конференцияға мемлекеттік органдар мен халықаралық ұйымдардың басшылары мен өкілдері, Еуропа мен Азияның 20 елінен сарапшылар мен ғалымдар қатысты, олардың 11-і – Астана хабының қатысушы елдері.
