Сән әлемі – өзгермелі де құбылмалы әлем. Сән – киім кию мәдениеті, өмірдің әр түрлі сферасында жеке талғамның уақытша үстемдік етуі. Назарларыңызға көптеген картиналардың ішінде сән индустриясымен байланысты ең қызықты көркем фильмдер топтамасын ұсынамыз.
1. «Коко до Chanel»
«Шанель» – француз сән үйі. Оның негізін қалаушысын, әрине, бәрі біледі. Әйгілі әйел, заманауи сән үлгісін өмірге әкелген Коко Шанель – әр қыздың талғамынан орын табатын кішкентай қара көйлекті, «Tweed» сәнді жакетін ойлап тапқан танымал дизайнер. Энн Фонтейннің режиссерлігімен түсірілген кино туындының басты рөліндегі Одри Тоту – XX ғасырдың ең талантты дизайнерінің сән әлеміндегі танымал болғанға дейінгі өмірін сомдайды. Коко Шанельдің фанаты болсаңыз, онда бұл фильм дәл сізге арналған.
2. «Дьявол носит Prada»
Көрермендерді алғашқы сәттен бастап-ақ баурап алар аталмыш кино туындыда – Андреа есімді журналист қыздың өмірі сыр шертіледі. Нью-Йорктағы танымал журналдардың бірінде редактор қызметінің көмекшісі болып жұмыс атқаратын Андреаның сән индустриясындағы журналистік ізденісі, сән әлемінің қыр-сырлары, фэшн журналдарды шығару үрдісінің барлығы – осы фильмде көркем түрде көрермен назарына ұсынылады.
3. «Валентино: Последний Император»
Итальяндық сән әлемі – Валентино есімді әйгілі дизайнердің есімімен байланысты. Себебі, дәл осы дизайнер алғашқылардың бірі болып Италиядағы сән индустриясының дамуына үлес қосқан адамдардың бірі. Бұл деректі фильмде – танымал Валентиноның сән әлеміндегі қызығушылықтары, еңбек жолындағы қиындықтары, жалпы айтқанда, сіз біліп, үйренгіңіз келген жаңашылдықтың барлығы – дәл осы кино картинада көрсетіледі.
Индира Жұмагелді
